Fouji Chhuti Peth – Trooper on Leave

 
Illustration : Mir Suhail
Protagonist: Ramvichar Koi (from Chhattisgarh) Locales:1) A village in Chhattisgarh 2) A village in Kulgam, Kashmir Note: This is the first short fiction ever written in Diacritical Roman Kashmiri language. And this is also the author's first Kashmiri language fiction. Afsāna

Foujī čhuṭī peṭh

Šahnaz Bašir

Sārivī khota, pannis pānas ma waniv apuz. — Fyodor Dostoyevsky (Karamazov Baradari)

Goḍniuk manzar, yus Čhaṭisgarhik Rāmvičār Koian ghara watith wučh, gov temis zan sanith hiu. Tahnzi zanāni yath nayis wazlis frijas sorui mahala ous sāl karith pōza karni ounmūt tath poaši māla, zeeṭh teik ta mušqa tuji laegith wučhith gov su zan rabōd hiu.Temis peo Kulgām ki aki mahala ki gharuk su frij yād yus temisend saethī ta doast Ratan Lalan latav ta bandōk-bhaṭha dabav saet phaṭrovmūt ous.

Yemi laṭi ās Rāmvičāras dahan dohan hinz čhuti zan ti beečhith meejmats.Wāreh zār-pār pata ous Major Gopal Prasad kumlāvna āmūt.Tsoran retan lagatār navjawān sangbāzan ta jangjōan saet muqābla karān karān ous Rāmvičār Koi, na sirif jismaenī balki zehnī toar ti soakhta govmūt. Panun nov frij ta Kulgāmiuk phuṭmūt—došvai yikvaṭai zehnas manz thavith ous amis zan gaila hiu bāsān. Frij čhuna kahn sasta čeez; doan retan hindi nesf nesf tankha jamah karna pata ous yi mumkin sapudmūt. Ta Ratan Lal, Kulgām kitemi gharuk frij phaṭrāvān wucčun kōtah sahal ous bāseomūt…Šayad agar meti akh za lata āšan sinmaets, ya akh za čeez meti āšan phaṭraimaet, ba āsha na yūtah gotangomūt?—sōnč Rāmvičāran.

Yana peṭh yi Kašeeri manz ous tāināt āmūt karna tana peṭhai ous aemsendis demāgas kamav tām sawālav wunal karmaets.

Wuni ous amis dam sambālnai ta aemsenzi bṛa māji waets khabar zi Rāmvičār čhu āmūt. Rāmvičāran traei doašvai beag athav manz pathar ta sedeo makāna kis paetmis āngnas kun. Brohn brohn Ram ta pata pata gām waṭi maenz. Khaerpaṭh karna brohnhai traev mājiguih kraej pathar, watsc thod ta aeksīšahas manz wonun nečvis, “Ba āsas wanān tse kar yikh…goḍa nita mea aečhan hindis dākhtaras. Agarnai guhis fakh āsiha, ba kati labha guih leib,ta krāji kyah banāvha.” Magar māji hinzan aečhen hinzt cāmph bāsei naRāmvičāras tītsah afsosnākh yītsamis Kulgām-ken bačan hinz pellet-lad ta rata-dār aečha. Yiman aečhan hiund khayāl yivān yivān dits Rāmvičāran pannis demāgas denan ta ditun māji dilāsa ta kornas wāda dākhtaras ninuk.

Māji saet kath karān karān peyi Rāmvičāras āngna kis paetmi devār kis malbas kun nazar. Yi lab aes ami tarfa-kev gunḍa hamsāyev musalsal doyumi laṭi pathar daerith ditsmats.Ami malba saet peo Rāmvičāras su tāza wāqah yād yath manz aemsend beyik saethian akis jangjōas mārna pata temi makān kis malbas peṭh, yath makānas manz su jangjō khaṭith ous rōdmūt, natsun ous kormūt.

__

Aečh dākhtar wānas peṭh pyarān pyarān wučh Rāmvičāran kehn nafar yim mareezan hinz waer phaṭravith aes andar atsān.Aik buzarg mareezan won loteiy, “Yim gai MP saeben sufaerši mareez.” Māji hindi baethi peṭh bār bār mačhi tulan yeli aemsend tāban jawāb diut, yi woth thod ta sedeo dākhtar sendis kamras kun. Khadmathgāras hokun dakka dith yeli Rāmvičār andar tsao, Dākhtar woth thod ta logun šoar.

Rāmvičāran hov panun šanākhti card ti magar dākhtaras peo na aemsendis hindustaen fouji āsna saet kahn ti asar. Yi āv kaṛna dakka divan divan nebar. Aem tuj moaj ta drāv dazān dazān haspatāla manz. “Sinukh balāi…ba nimath tse beyi kaensi asal dākhtaras,” aem won māji.

Ghara wāpas atsān peyi Rāmvičāras beyi aki laṭi devār kis malbas kun nazar. Zyōṭh šah heth kor aem zehnas manz faesla makaemī MP saebas niš gasith ath nyāyas kahn pošwun tadoaruk karunuk.Šarārath ta parešān hout aesith gov amis beyi akh tašveeš: akoi doh ghara āmtis peyn yeetsa kāmi peoṭhus peṭh karni, yi ous na mea gumānai. Ta tami waraei ti ās na kuni mujrahī. Amis ous gomūt panni zanāninov mobile diyun mašdai. Yi tsao seodui bāna kuṭhis manz ta pilnovun panni šaramdār zanāni kun akh ḍaba yath peṭh phonečšakal banaevith aes. Phonas kun nazar pethai āyi aemsenz nav-wariš kōr pratsan ras-dār bata laerith ta wonun maelis, “Papa mea khaetra kya ounuth?”

“Tse kis čham aenmats guṛin.” Guṛin lafz wanithai peyi Rāmvičāras temis lakči koari hinz sua guṛin yād yath, bāqiyan čhezan lura pār karith, aemsend aik saethi Mahešan Kulgām ki aki ghara manz nerān nerān lata monḍ aes kaermats.

Kōr gai khoš guṛin bōzith ta gai nalkas kun čoanṭh čhalni. Zanāni thov mobile tulith ta beeṭh khāndāras saet katha karni. “Čhuti heki na hana beyi ratsa zeeṭith?” aem prutc khāndāras hatsis peṭh banger phirān phirān.

“Dah do ti ditikh baṛa zār pār karith.”

Ta ami brohnai zi yi pritcihā khāndāras beyi kehn, ya wanihes panani beyi akki laṭi guabbi khoar āsnuk, Rāmvičāras kor māji ālaw.

“Wuni čhai sulai. Gasakh na MP Čaran Kumar saebas niš ta anzrāvakh devāruk nyai? Magar dākhtar sund wanizes na kehn,” won māji.

“Theekh čhu.”

Thaka rostui drāv Rāmvičār MP Čaran Kumaras kun. Yi ous wuni goḍnikui doh ta yeetsah kāmi. MP sendis sāf suthra gāmas ta aemsendis fakalad gāmas manzbāg ous akh mokur talāv. Talāv baṭhi baṭhi pakān pakān peo Rāmvičāras Čaran Kumarun su dah wari proan wāz yād yemi saet još yith yi foujas manz ous bartī gomūt.Kumar saeb anzrāi miyon nyai brinzis manz—sōnč Rāmvičāran.

Yi yeli Čaran Kumarni koačhi peṭh woat, ati wučh aem kyathām wosa drasa hičh.

“MP saebas čhu az koari khāndar. Su čhu āwur,” won Rāmvičāras darvāzas peṭh khaṛah santeir.

“Magar yi nai čhuna zan tiuth Khāndar bāsaenī?” Rāmvičāran prutc santeiris.

Santeir wučh hana dačhun ta khovur, gov Rāmvičāras nazdeeq ta wonnas kanas tal loteiy, “MP saebni koari čhu asal Londonas manzai khāndar kormūt…Pakistaen laṛkas saet… Yeti čha woni yehai rasam hičh…”

Yi bōzith gov Rāmvičār dam phaeṭ hiu ta drāv pot khorei wāpas.

Phaiṭmatev koṭhev ghara waetithai traev aem paetmis āngnas manz gāv yala ta phirnaeven sua aura yora. Gāyi hinza wogni aečh wučhith gai amis panin saeri sreyn khayāl kehntsas kālas mašdai. Niči wučh moal āngnas manz ta kaṛen kunī dav nebar. Kuas tām kitāb athas ta pencil dandan manz heth wonun maelis, “Papa, guṛin kyazi čhu mas neerith tsalān?”

Rāmvičāras āv na kahn jawāb samjh. Aem thav gāv tiklis wāpas ganṛith ta tsāv koari saet andar makānas manz.

Rāmvičāras āyi na rātas nindrai. Subhas suley tuj aem moaj ta drāv šahar aečh ḍākhtras kun.

Dupharas ghara wāpas waetithai āv amis phone. Yi ous Major Gopal Kašeeri peṭh.

“Rāmvičār, tse kar čhuti phaṭa phaṭ muatal ta yi wāpas… Čoan saethi Ratan Lal gov rāth šaheed.”

“Yi bōzith gov Rāmvičār Koias patim šah path. Wuni ous doyumui doh čhuti hiund ta ath āw ḍešun. Kāla Kālai drāv yi moyōs haltas manz wāpas Kašeeri kun. Nerān nerān traev aem zeeṭh nazar nayis wazlis frijas kun yath tcāyi aemsanz zanān aes kala nemrith amis tsōri tcepi wučhān ta hatsis peṭh bangeri čeer divān. Nič āyi dorān dorān ta wonun maelis, “Papa, yeli ba baeṛ gasa, tse ankha mea scōty?”

Kulgāmi campas manz log Rāmvičāras pai zi Ratan Lalan ās asal khodkaši kaermats. Yi bōzith gov su zyadai parešān ta pašemān.

Kehntsan dohan manz log Rāmvičār panni momōl či duty peṭh. Aki doh subhas wardi istaer karān karān peo amis Ratan Lal beyi ṭakāra paeṭh yād. Ta saetī peo amis yād ki “az čhu tankha nernuk doh”. Istaer karān karān log yi hisāb karni ki yi kūtah heki reta path reta bačevith niči hinzi scōty khaetra.



About the Author(s):